Викингшки дневник бр.10 – Последно крстарење во карипското море

Штотуку заврши последното крстарење по западните (помалку интересните) кариби за оваа сезона. Ова крстарење интересните работи се случуваа повеќе на бродот, помалку на копно.

Крстарењето ни започна со посета од американската крајбрежна стража. 8 офицери го проверија бродот дали е безбеден за нас и за гостите што меѓу другото опфаќа и вежба за евакуација која што успешно ја поминавме. По ова истрчав надвор за да ги земам онлајн порачките кои беа стигнати во Сифер’рс хаус. Овој пат не можеа да дојдат на бродот. Иако е блиску сепак се качив во комбето кое оди до Росс. Набрзинка ги земав работите кои ги имав порачано, а имав многу. Таму го најдов Џермејн од гифт шопот на брод и откако ги собравме своите работи жената што работи таму не врати назад на брод со својот џип.

Од порачаното најбитното нешто беше мојот нов лаптоп. Lanovo Legion 5i со 16 инчен екран, i9 процесор, 32 гиги рамче, 1 TB SSD, NVidia 4060. Не е многу убав ама добар е во душа :) Долго време размислував каков лаптоп да купам и на крај решив да го купам овој по препорака од Денис, и тој има ист и уште беше на попуст во Б&Х. Покрај ова си купив и усб стикче од 500 гиги и кард ридер за мемориските картички од апаратот бидејќи лаптопот доаѓа без тоа.

Од Амазон порачав еден куп работи. Нова маска за телефонот, проѕирна. Келвин помисли дека сум купил цел нов телефон :) ремчиња за новиот саат. Масажер роза за Џудит бидеќи ѝ беше роденден. 2 пакети аргентински чај за Луси. 2 сета штрафцигери, еден за на работа и еден за дома. Келвин ме праша зошто давам свои пари, зошто не порачувам од фирма, му реков дека сетот чини 6 и пол долари и испадна одличен на мое пријатно изненадување. Купив и нови тригери за блиц.

Во врска со пристаништата немам што да пишувам нешто посебно затоа што и во двете интересни пристаништа бев ИПМ. Во Јамајка традиционално не излегувам надвор бидејќи работам до пладне а во Јамајка треба пред 2 да се вратам назад на бродот и блиску до пристаништето нема ништо интересно, треба или да одам пола саат пеш или да фаќам некаков превоз.

Во Костарика излегов до кафетеријата за да ги апдејтирам апликациите на телефонот. Интернетот не беше нешто посебно брз, ама доволно за да апдејтирам. Кафе овој пат пиев ладно карамел макијато и беше одлично. Овој пат седев со една кинескиња од бар одделот која што уште не знам како се вика. Пред да заминам земав и мала лименка кока кола и покрај моето го платив и нејзиното кафе, се вкупно 10 долари. Потоа зедов да прошетам накај паркчето и ги видов техничарите од ентертеинмент како пијат пиво. Поседов малку со нив, тропавме глупости и заедно се вративме назад на брод.

Во Хондурас бев само до кафетеријата на пристаништето каде што едно макијато фредо чинеше 8 долари. Сакав да симнам неколку спотови од јутјуб ама успеав да го симнам само Disconnect од Беки Хил и Чејс & Статус.

Е сега за интересните работи кои се случуваа на бродот. Уште првата вечер се случи крвавата месечина. Останав скоро до 3 наутро за да направам фотографии. За жал бидејќи бродот се ниша успеав до некаде ОК фотографија да направам од затемнувањето, додека од црвенилото испадна многу матна фотографијата. Друштво ми правеа Шалини од спа центарот која што правеше фотографии со нејзиниот телефон и Мери која што пушеше цигари и си викаше какви ненормални другарчиња имам наместо да спијат, утре се од 8 на работа тие ја фотографираат месечината :)

Вечерта после Јамајка имавме цртање во мензата каде што јадеме. Кога стигнав таму беа само Жајна, Сузан и Кристијана, ама потоа дојдоа Шалини и Ада, Одет, една девојка од хаускипинг на која и ги заборавив името. Дојдоа новите пејачи и пејачки од театарот. Повеќето боеја камчиња или дрвени плочки. Јас по повод пожарот во Кочани насликав феникс. Не е нешто нај-нај, меѓутоа ми значи бидејќи добар дел од животот поминав клабирајќи се во Кочани.

Наредниот ден беше спа ноќ за вработените и најголем дел од времето го поминав со Ада и Шалини префрлајќи се од собата со пареа во собата со снег и назад. Шалини е индијка од Јужна Африка и лани ја скршила ногата и качила доста килограми на себе, така да сега е во форма... топчеста форма додека Ада е норвежанка висока метро осумдесет со тело како од спортс илустрејтид кога прикажуваа совршено извајани тела и добар дел од муабетот беше на тема физички игзлед.

Вечерта после панамскиот канал имавме кру апрешиејшн динер на која по навика повторно служев печено прасе на колегите. Сузан ми кажа да бидам мошне внимателен бидејќи Адем еднаш кога служел прасе се изгорел од грејачите што се над прасето. Нормално дека бев внимателен бидејќи и јас се имав изгорено, меѓутоа малку, не толку сериозно како Адем. Оригинално требаше да служам само пола саат, меѓутоа мојата замена не дојде па служев скоро цел саат. Како и да е, претходно јадев во бифето за гости така да сега ми требаше само малку суши и малку десерт кои што ги добив, така да задоволен си заминав од вечерата.

Наредниот ден Бредли организираше журка во кру бар по повод Свети Патрик ама не отидов. Не знам зошто ама ме мрзеше. Играв Нид фор Спид на лаптопот :)

Вечерта после Козумел бев да го видам шоуто на круз директорот Арон по што отидов во спа центарот. Бидејќи отидов малку подоцна ми беше страв да не сум утнал нешто, ама му се јавив на Михајло во текот на денот да проверам дали спа центарот ќе биде отворен вечерта за кру... Како и да е кога влегов ја видов Грејс. Таа ми кажа дека знае дека е спа ноќ за вработените бидејќи душеците се тргнати од дрвените лежалки.

Претходно спомнав дека има нови пејачи и пејачки во театарот, додуша целиот ентертејнмент тим кој што се појавува на сцена е сменет. Музичарите се повторно филипинци ама уште ги немам запознаено онака да седнам да правам муабет со нив. Дуото се исто како и претходните филипинци само што овие се пар. И главните ѕвезди, Хедер и Џејд биле претходно на Викинг Венус додеа Хари и Роби се за прв пат на брод. Кога дојдоа на цртање ги прекрстивме во Хари Потер и Рон Визли. Две од нивните шоуа изгледав во театарот и едно изгледав на телевизорот во мојата соба. Морам да кажам дека се одлични.

Гостинот забавувач беше исто така одличен. Ме мрзи да го отворам службениот лаптоп да видам како се вика. Му бев само на второто шоу. Според стилот на пеење спаѓа во групата крунери. Е сега крунинг стилот на пеење е американска измишљотина и дефиницијата вика дека тоа е интимно пеење на микрофон. Репертоарот му беше од Бинг Крозби, преку Френк Синатра, Елвис Пристли и Џим Морисон до Мајкл Бубле.

Следното крстарење е пловидба кон Европа и сите ние со радост го чекаме.